Okulondoola engeli Eitu ly'Olusoga bwe Linaatuusibwa mu Iwanika: Omutindo ogulaga Olulimi bwe luli, bwe luteekwa okuba oba bwe lube lutwalibwe.

Samenvatting

LUSOGA ABSTRACT:Obufunze: Empandiika y'Olusoga ekaali inhuma inho waile nga waliwooku obubonelo obulaga enkola y'obuzila mu kugizimba. Olusoga lukaawagamiile wansi w'ennimi nga Oluganda n'olulimi olw'eiwanga, Olungeleza. Ensonga endala ku dhikaalemeisa Olusoga okwetengelela n'okuba nti lulina ebigambo ebilwingila buli olukeile. Eky'embi, enkyukakyuka ebigambo bino ebiyaaka by'eleetawo eli kwidha mu kiseela nga Olusoga lwene lukaali kufunilwaku mpandiika ntongole. Waile walifu dh'Olusoga buti dhiliwo kamaala, wazila ndala ku dho eli kugobelelwa mu kuwandiika kubanga abantu bakaawandiika nga bwe babona. Ebiwandiiko ebili ku Lusoga oba mu lulimi Olusoga byetaagibwa okulaga Olusoga bwe lulina okuba ela n'ebilina okwebuuzibwaku. Eibula ly'ebiwandiiko oti ni bino litegeeza nti omunoonheleza alina okwefunila entambi dh'Olusoga olwogelwa ela yeewanulila Olusoga oluli mu ntambi edho okusobola okutegeela engeli olulimi olwo bwe luli mu kiseela ekyo. Kino kileeseewo obuzibu obundi nti Olusoga olwogelwa tilutongoze ate lulimu emigote kamaala egyandibaile gilondoolwa okusinziila ku mutindo omusengeke singa lubailem mu buwandiike. Ekika ky'Olusoga oluli mu mbeela eyogelwa kya ndhawulo ku kili mu mbeela y'obuwandiike. Okuwanula Olusoga okuva mu ntambi kw'aba nti kugiililiile kwagayaga na kunoga kibala kikaali kwenga bukalamu. Aye engeli ye kili nti Olusoga lulina aboogezi abaswika mu bukaile obubili, abanoonheleza ku Lusoga baalisaine kutandiika li? Olupapula luno lulambulula enzimba y'eitu ly'Olusoga nga ekitundutundu ky'eitu lino kiviile mu Lusoga olwawanulwa okuva mu mbeela eyogelwa. Obuzibu obwayagaanibwa mu mpandiika y'ebigambo ebyawanulwa n'obusimbiibwaku eisila. Okulaga engeli y'okuzigula obuzibu bw'empandiika mu isomo ly'amawanika kwetaagisa enkola eteekubila inho ku nsonga ndala aye enoonheleza engeli esinga kugasa omutendela gw'obuzibu obulondoolebwa. Waile nga obuzibu obundi busobola okugondhoolwa okugiila ku mutendela oguteebwawo, gwalaga olulimi nga bwe luteekwa okuba, obuzibu obundi bwetaagamu okwegendeleza nga wano mubaamu enkola y'okulaga nga olulimi bwe luli. Ate bwo obuzibu obundi bwandyetaagisa abawandiisi b'amawanika okuwaayo obudhulizi obusinziilwaku endowooza dhaibwe edhitagobelela mitendela giliwo nga balaga olulimi bwe lube lutwalibwe waile nga kino kyandiba nga kikontana n'amateeka g'olulimi agaliwo.LUSOGA KEYWORDS:Ebigambo ebikulu: olusoga; uganda; walifu; empandiika; eitu ly'olusoga; endhogela; okuwanula olusoga; ebigambo ebilamba; ebigambo ebigaitilile; ennamula ku bigambo ebyawukana; ebigambo ebyeyazike; emitendela gy'obutongole; ennhunga ya naliina; olulimi bwe luteekwa okuba; olulimi bwe luli; olulimi bwe lube lutwalibwe