Differences in the Inclusion and Treatment of Terminology in OALD3, OALD4 and OALD8

Samenvatting

Verskille in die insluiting en behandeling van terminologie in die OALD3, OALD4 and OALD8.Hierdie artikel gaan oor die insluiting en behan­de­ling van wetenskaplike en tegniese woordeskat in die derde, vierde en agste uitgawes van Oxford Advanced Learner's Dictionary. Die vergelyking van hierdie uitgawes is gebaseer op 'n willekeurige steek­proef van 50 bladsye van OALD8 vanaf die lemma foot tot gimmick. Dieselfde lemmareeks is ook in OALD3 en OALD4 ondersoek. Eerstens is verskillende maniere van die aanduiding van termi­nologie vasgestel: d.i. onderwerpsveldetikette, definisies en kortpaaie. Daarna is al die lem­mas of hul betekenisse wat met 'n onderwerpsveldetiket gemerk is, opgespoor en 'n lys van al die onder­werps­veldetikette wat in hierdie lemmareeks gebruik is, opgestel sodat ooreenkomste en ver­skille tussen die verskeie uitgawes bepaal kan word. Die vergelyking het getoon dat die aantal onder­werps­veld­etikette in aldrie uitgawes amper eenders is, maar die onderwerpsveldetikette ver­skil van uitgawe tot uitgawe. Die kwessie van oordrewe spesifieke etikette (bv. 'anatomy', 'phonet­ics') en etikette wat te breed is (bv. 'science', 'technical') word behandel. Die volgende deel van die arti­kel word gewy aan die veranderinge in die behandeling van TSD- leksikale items in hierdie drie uit­gawes van OALD, vanaf ontbrekende etikette tot veranderinge in etikette en maniere van aan­duiding van termi­nologie deur middel van definisies en/of kortpaaie. Die slot stel verbeteringe in die onder­werps­veldetikette self voor, 'n konsekwenter manier om onderwerpsveldetikette in te sluit selfs wan­neer die definisies die onderwerpsveld aandui en 'n verbeterde gebruik van kort­paaie wanneer die verwysing na 'n spesifieke onderwerpsveld is.